Interlúdios...: Adiós, montes e prados, igrexas e campanas

Adiós, montes e prados, igrexas e campanas;

adiós, Sar e Sarela cubertos de enramada;

adiós, Vidán alegre, moíños e hondanadas;

Conxo, o do craustro triste i as soedades prácidas;

San Lourenzo, o escondido, cal un niño antre as ramas;

Balvís, para min sempre o das fondas lembranzas;

Santo Domingo, en donde canto eu quixen descansa

- vidas da miña vida, anacos das entrañas -

e vós tamén, sombrisas paredes solitarias

que me vicheis chorare soia e desventurada;

adiós, sombras queridas; adiós sombras odiadas;

outra vez os vaivéns da fertuna

pra lonxe me arrastran.

Cando volver, se volvo, todo estará onde estaba:

os mesmos montes negros i as mesmas torres pardas

da catedral severa ollando as lontananzas.

Mais os que agora deixo tal coma a fonte mansa

ou no verdor da vida, sin tempestás nin bágoas,

¡canto, cando eu tornare, vítimas da mudanza,

terán de presa andado na senda de desgracia!

I eu..., mais eu ¡nada temo no mundo,

que a morte me tarda!

(Rosalía de Castro)

Não há machado que corte a raiz ao pensamento...